آڑھتی کا زمیندار کے مال کی بولی لگا کر خود خریدنا

سوال

غلہ منڈی میں جس آڑھتی کے پاس زمیندار اپنا مال لاتا ہے تو وہ اس کے مال کی بولی لگاتا ہے۔ سب آڑھتی جمع ہوجاتے ہیں۔ اب یہاں دو صورتیں پیش آتی ہیں:

1. بولی کے لیے جمع ہونے والے حاضرین میں سے کوئی خرید لیتا ہے۔

2. خود بولی لگانے والا آڑھتی خرید لیتا ہے۔

پہلی صورت میں بولی لگانے والا آڑھتی کل قیمت کا %5 بطور کمیشن زمیندار سے وصول کرتا ہے۔ اس صورت کےبارے میں مسئلہ دریافت کر لیا گیا ہے۔

دوسری صورت میں جب کہ بولی لگانے والا آڑھتی خود خریدتا ہے، اس میں پھر دوصور تیں پیش آتی ہیں:

1) بولی لگانے والا آڑھتی بولی لگانے کے ساتھ ساتھ بولتا بھی رہے گا ۔ مثلاً حاضرین میں سے ایک نے2800 روپے من کی بولی دی۔ دوسرے نے 2850 کی دی۔ اس دوران بولی لگانے والا آڑھتی خود بھی بولی بولتا ہے۔ مثلا وہ پہلے دو کے بعد 2900 روپے کی بولی بول دے گا۔ پھر کوئی اور اس سے زیادہ کی بولی لگا دےگا۔ اب اگر بولی لگانے والا آڑھتی خریدنے کا ارادہ کر لے اور وہ سب سے زیادہ بولی بول دے تو وہ مال خریدلیتا ہے اور پھر %8 کمیشن کے نام سے کاٹ کر باقی پیسے زمیندار کو دے دیتا ہے۔

2) دوسری صورت یہ پیش آتی ہے کہ بولی میں مال کا صحیح ریٹ نہیں لگا۔ جب منڈی کا کوئی آڑھتی اسےخریدنے کے لیے تیار نہیں ہوا تو بولی ختم ہو جاتی ہے۔ اب بولی لگانے والا آڑھتی زمیندار سے معاملہ کر کے اس کا مال خرید لیتا ہے یا زمیندار مال رکھوا دیتا ہے اور دوبارہ بولی کا انتظار کرتا ہے البتہ ایسا کم ہوتا ہے۔ اب یہاں دو مقامات پر اشکال ہو رہا ہے، جس کا حل مطلوب ہے۔

1. بولی کے دوران بولی لگانے والے آڑھتی کا خود خرید نا درست نہیں کیوں کہ اس وقت وہ زمیندار کی طرف سے وکیل بالبیع ہے اور وکیل بالبیع کو دوران وکالت خود مال خریدنے کا حق نہیں اگر چہ موکل اجازت دے ورنہ ایک ہی شخص کا مطالِب اور مطالَب بننا لازم آئے گا۔ كما وقع فی کتب الفقہ۔

2. بولی لگانے والا آڑھتی جب خود خریدتا ہے تو %5 کمیشن کے نام پر کاٹتا ہے۔ مثلا: 100 روپے کے 95روپے زمیندار کو ملیں گے۔ اس %5 کی کٹوتی کو کیا نام دیا جائے؟

(1) کمیشن (2) حطِّ ثمن (3) تخفیف في الثمن

ابتداءکمیشن نہیں کہہ سکتے کیونکہ آڑھتی خود خریدار ہے۔ حطِّ ثمن پر محمول کرنا بھی مشکل ہے کیونکہ وہ رضا مندی پر موقوف ہوتا ہے جب کہ یہاں جانبین اسے ضروری سمجھتے ہیں۔ البتہ ابتداء تخفیف فی الثمن پرمحمول کیا جا سکتا ہے کہ یہ مراد لیاجائے کہ ان 95 روپے پر ہی واقع ہوئی ہے۔ البتہ اس میں اشکال یہ ہے کہ کیا یہ طریقہ ٹھیک ہے کہ 100 روپے ثمن طے کی جائے اور اس سے مراد 95 روپے لیے جائیں۔ یہ صورت بازار میں عام ہوتی ہے کہ جب بھی کوئی کمپنی سیل(Sale)لگاتی ہے تو لکھا ہوتا ہے کہ %20 ڈسکاؤنٹ۔ اب اصل بل تو پوری قیمت پر بنتا ہے لیکن بل کے آخر میں مذکورہ ڈسکاؤنٹ دیا جاتا ہے۔

حطِّ ثمن پر محمول کرنا اس لیے مشکل ہے کہ زمیندار یہ سمجھتا ہے کہ بیع تو 100 پر ہوئی 5 روپے کمیشن کی کٹوتی ہے۔ اگر اس کو معلوم ہو کہ یہ کمیشن نہیں بلکہ حطِّ ثمن ہے (جو کہ بہر حال زمین دار کی اجازت اور رضا مندی پر موقوف ہے) تو عام طور پر وہ اس پر راضی نہ ہوگا بلکہ 100 کا ہی تقاضا کرے گا۔ نیز اب آڑھتی اس بیع سے (جو 100 پرہوئی) انکار بھی نہیں کر سکتا کیونکہ بیع لازم ہو چکی۔

جواب

مذکورہ صورت میں آڑھتی زمیندار کی طرف سے وکیل بالبیع ہے اور چونکہ حقیقتا ًعاقد بھی وہی (وکیل) ہے اس لیے عقد بیع کے تمام حقوق بھی اسی وکیل (آڑھتی) کی طرف راجع ہوں گے ، لہذا اس وکیل (آڑھتی) کے لیے اس مبیع کوخود خرید لینا جائز نہیں، اگرچہ مؤکل (زمیندار) نے وکیل کو اس کی اجازت بھی دی ہو کیونکہ اس صورت میں اس وکیل کامطالِب اور مطالَب بننا لا زم آئے گا اور نزاع کی صورت میں یہی مخاصِم اور مخاصَم ہو گا اور فقہاء کرام رحمہم اللہ نے تصریح کی ہے کہ ایک ہی شخص عقد کے دونوں طرفوں کا مالک نہیں بن سکتا۔ (دیکھیے عبارت نمبر 1تا7 )

اور اگر اس کے باوجود بھی وکیل بالبیع اس مبیع کو خود خرید لے تو اس صورت میں یہ بیع فاسد ہو گی اور بیع فاسد کااصل حکم یہ ہے کہ اگر مبیع موجود ہے اور علی حالہ قائم ہے تو اس بیع کو صحیح کرنا اور مبیع کو اصل مالک کی طرف لوٹانا ضروری ہے لیکن اگر مبیع کے ہلاک ہونے کی وجہ سے یا کسی اور بناء پر بیع کو فسخ کرنا متعذر ہو تو اگر مبیع مثلی ہے تو اس کا مثل اور اگر قیمی ہے تو جس دن مبیع پر قبضہ کیا ہے اس دن کی قیمت اس وکیل پر لازم ہو گی اور اس قیمت میں کمیشن، حطِّ ثمن یا تخفیف فی الثمن ابتداءً کے نام کسی قسم کی کٹوتی نہیں ہو گی۔ (دیکھیے عبارت نمبر 8 تا 11)

البتہ اگر وکیل (آڑھتی ) اس چیز کو خریدنا چاہتا ہے تو اس میں دو صورتیں اختیار کی جاسکتی ہیں:

1. پہلی صورت وہ ہے جس کو "ردالمحتار “ اور ”شرح المجلة للاتسی" میں بیان کیا گیا ہے کہ پہلے یہ وکیل (آڑھتی)کسی اجنبی کو یہ مبیع فروخت کر دے اس کے بعد اس مبیع کو اجنبی سے خرید لے۔ (دیکھیے عبارت نمبر 12اور 14)

2. دوسری صورت یہ اختیار کی جاسکتی ہے کہ یہاں دو الگ الگ عقد کیے جائیں :

(1) وکالت مؤقته (2) بیع مطلق

اس کی تفصیل یہ ہے کہ زمیندار ، آڑھتی کو یوں کہے کہ تم میرا یہ مال فروخت کرو اور اس کی فروختگی پر تم مثلاه فیصد کمیشن دوں گا لیکن تمہیں اس مال کی فروختگی کا حق صرف اس بولی کے اختتام تک ہے، لہذا بولی کے اختتام تک اگر کسی ایک ریٹ پر اتفاق ہو جائے تو ریٹ لگانے والے کو وہ مال فروخت کر دیا جائے اور آڑھتی کو اس کا کمیشن مل جائےگا اور اگر کسی ریٹ پر اتفاق نہیں ہوتا تو بولی ختم ہو جائے گی اور وکالت کی مدت بھی پوری ہو جائے گی اور چونکہ وہ مال فروخت نہیں ہوا اس لیے اس کو کمیشن نہیں ملے گا اور آڑھتی کی حیثیت ایک عام آدمی کی ہو جائے گی ، اب اگر آڑھتی اس مال کو خرید نا چاہ رہا ہے تو ز میندار سے عقد بیع کرلے اور اس کا مال خرید لے۔ (دیکھیے عبارت نمبر 13)

البتہ اس دوسری صورت میں دو باتوں کا لحاظ رکھنا ضروری ہے:

1. یہ کہ جس وقت بولی لگائی جارہی ہےآڑھتی ساتھ ساتھ خود بولی نہ لگائے، کیونکہ وکیل بالبیع ہونے کی بناء پر خریدنے کی نیت سے بولی لگانا درست نہیں اورخریدنے کی نیت نہ ہو تو یہ صورت نجش میں داخل ہے اور نجش مکروہ تحریمی ہے۔ (دیکھیے عبارت نمبر 14تا 16)

2. یہ کہ اس صورت میں آڑھتی کی دو حیثیتیں ہیں اور ان دونوں حیثیتوں کو ایک دوسرے سے ممتاز کرنا ضروری ہے ایک حیثیت وکیل کی ہے، اس کا تقاضا یہ ہے کہ جب تک زمیندار کا مال وکیل ہونے کی حیثیت سے آڑھتی کے قبضہ میں ہے اس دوران اگر مال آڑھتی کی تعدی کے بغیر ہلاک ہو جائے تو موکل کی ملکیت ہی ہلاک ہو گی آڑھتی پر اس کا ضمان نہیں آئے گا اور دوسری حیثیت مشتری کی ہے اور اس کا تقاضا یہ ہے کہ اگر مال ہلاک ہو جائے تو آڑھتی کی ملکیت ہلاک ہوگی اور اگر ثمن ادا نہیں کیا تو آڑھتی پر اس مال کا ثمن ادا کر نالازم ہو گا لہذا تنازع سے بچنے کے لیے ضروری ہے کہ جب بولی ختم ہو جائے تو آڑھتی مؤکل کو اس کی اطلاع کر دے اس کے بعد مؤکل کی اجازت سے وہ مال خرید لے۔ (دیکھیے عبارت نمبر 17اور 18)