اجتماعی قربانی کرنے والے کاایامِ قربانی میں قربانی کرنابھول جانا

سوال

درج ذیل مسائل میں رہنمائی درکار ہے:

کچھ لوگ ایک ادارہ کے لئے قربانی کی رقم جمع کرتے ہیں کہ قربانی کسی غریب علاقہ میں کی جائےتا کہ وہاں کے غریب مسلمانوں کو عید کے دن قربانی کا گوشت ملے، اور ادارہ کا فائدہ یہ کہ چمڑا فروخت کر کے اس کی قیمت سے ادارہ فائدہ اٹھائے ۔ اس سال ایک آدمی کو چند حضرات نے رقم دی ، وہ بالکل بھول گیا اور قربانی کے ایام گزر گئے ، اب اس رقم کا کیا کیاجائے؟

1. ان تمام لوگوں کو جنہوں نے قربانی کے لئے رقمیں دی ہیں،رقم واپس کرنا ضروری ہے یا وہ و کیل ان کی طرف سے خود ہی صدقہ کردے؟

2. بعض حضرات کے نام تو معلوم ہیں لیکن ان سے کوئی تعارف نہیں کہ وہ کہاں رہتے ہیں ،نہ ان سے ملاقات کی کوئی صورت ہے ایسی صورت میں کیا کیا جائے؟

3. جن حضرات کے نام اور پتے معلوم ہیں ،ان کو رقم واپس کرنے میں فتنہ ولڑائی کا اندیشہ ہے، کہ وہ حضرات و کیل کو نقصان پہنچانے کے درپے ہو جا ئیں گے، اسی طرح آئندہ سال ادارہ کا بھی نقصان ہے، اس صورت میں کیا وکیل خود ہی صدقہ کردے تو جائزہے؟

4. اگر وکیل کے لئے اس رقم کا صدقہ کرنا جائز ہے تو کیا بڑے جانور کے ایک حصہ کی رقم صدقہ کرنا کافی ہے یا پوری بکری کی ر قم صدقہ کرنی ہوگی ؟

جواب

(1)۔۔۔صورت مسئولہ میں جن لوگوں نے رقم دی تھی اب ان سب کو رقم واپس کرنا ضر وری ہے کیونکہ مذکورہ آدمی رقم دینے والوں کی طرف سے صرف قربانی کرنے کا وکیل تھا قربانی کی رقم صدقہ کرنے کا وکیل نہیں تھا لہذا قربانی کے ایام گزر جانے کے بعد وکالت ختم ہوگئی لہذا اب موکل کو اس کی رقم واپس کرنا ضروری ہے اور موکل کے ذمہ اب درمیانے درجے کے بکرے یا دنبہ کی قیمت صدقہ کرنا ضروری ہے لیکن اس صدقہ کا سبب چونکہ وکیل ( یعنی مذکورہ آدمی )ہے اس لئے درمیانے درجے کے بکرے کی قیمت اگر قربانی کے لئے دی ہوئی رقم سے زیادہ ہو تو اس آدمی کے ذمہ زائد رقم ادا کرنا بھی ضروری ہے۔ ( عبارت نمبر :1،2،3)

(2)۔۔۔کسی بھی طریقہ سے اولاً حصہ داروں کو پوری صورتحال سے مطلع کر دیا جائے ،صورتحال سے آگاہ کرنے کے بعد ان کی صریح اجازت سے ان کی طرف سے درمیانے درجے کے بکرے کی قیمت صدقہ کر دینا جائز ہوگا،لیکن اگر مکمل کوشش کے باوجود حصہ داروں سے رابطہ نہ ہو سکے تو درمیانے درجہ کے بکرے کی قیمت اس نیت سے ان کی طرف سے صدقہ کر دینے کی گنجائش ہے کہ اگر کبھی ان کو اس صورتحال کا علم ہو جائے اور وہ آپ کے صدقہ پر راضی نہ ہو بلکہ اپنی رقم کا مطالبہ کریں تو آپ کے ذمہ ان کی رقم ان کو واپس کرناضروری ہوگا۔ (ماخذہ: امداد المفتین ص874سوال نمبر 773، نیز عبارت نمبر 4،5)

(3) ۔۔۔ قربانی کے دنوں میں قربانی نہ کرنے کی وجہ سے چونکہ سابقہ وکالت ختم ہو گئی ہے اس لئے حصہ داروں سے رابطہ کر ناممکن ہونے کی صورت میں ان کی صریح اجازت کے بغیر ان کی رقم صدقہ کرنا جائز نہیں ہے، البتہ اپنےبھول کا عذر مناسب انداز میں حکمت و مصلحت کے بیان کر دیا جائے۔

(4)۔۔۔او پر اس کا جواب آچکا ہے کہ اولاً وکیل کے لئے حصہ داروں کی رقم صدقہ کرنا جائز نہیں ہے بلکہ حصہ داروں ہی کو پہنچانا ضروری ہے، البتہ ان کی صریح اجازت کے بعد یا ان کے بارے میں کوئی معلومات حاصل نہ ہو سکنےکی صورت میں درمیانے درجے کے بکرے کی قیمت صدقہ کرنا ضروری ہے صرف حصہ کی رقم صدقہ کرنا کا فی نہیں ہے۔(دیکھئے: امداد الا حکا م : 2 / 274، احسن الفتاوی : 7 / 480، اور عبارت نمبر 6)