آرڈر پر منگوائے ہوئے سامان میں عیب نکلنے کی وجہ سے کم قیمت ادا کرنا

سوال

ہماری ایک فیکٹری ہے اور اس کے لئے ہم بڑے پیمانے پر خام مال منگواتے ہیں۔ جب مال ہمارے پاس پہنچتا ہے تواس میں کبھی کبھار کوئی خرابی یا عیب نکل آتا ہے یاوہ مطلوبہ صفات کا حامل نہیں ہوتا ایسی صورت میں ہمیں کئی مسائل کا سامناکرنا پڑتا ہے۔ ہمارا اصول ہے کہ اجناس وغیرہ میں 3 تا 5 فیصد کچر ا عیب شمار نہیں کرتے مثلاً اگر ہم نے گندم خریدی تو اتنی بات تو قابلِ برداشت ہوتی ہے کہ اس میں سے تین سے پانچ فیصد تک کچرا موجود ہو، لہذا جب ان کا بھیجا ہوا مال کمپنی پہنچتا ہے توگاڑی اتارنے سے پہلے ہی کوالٹی چیک کی جاتی ہے جس کا طریقہ یہ ہوتا ہے کہ ایک ٹرک پر اگر 100 بوریاں لدی ہوئی ہوں تومختلف بوریوں سے چار پانچ نمونے لے کر چیک کر لیا جاتا ہے ، اگر اس مذکورہ مقدار کے بقدر ہی کچرا موجود ہوا تو مال اسی طرح قبول کر لیا جاتا ہے کیونکہ اس سے بچنا ممکن نہیں۔ لیکن ہوتا یہ ہے کہ بعض دفعہ دس فیصد تک کچرا موجود ہوتا ہے، ایسی صورت میں وہ مال وہیں روک لیا جاتا ہے۔

اب ایک صورت تو یہ ہو سکتی ہے کہ سامان ان کو بالکل واپس کر دیا جائے یا انہیں کہا جائے کہ صاف کر کے لےآئیں، مگر اس میں عموماً مشکلات اور جانبین کیلئے پریشانیاں ہوتی ہیں اس لئے خریداری کا معاملہ کرنے کیلئے سپلائر کے ساتھ یہ معاملہ کیا جاتا ہے کہ جس حد تک کچرامعاف ہوتا ہے اس سے زائد اندازہ شدہ اضافی کچرے (مثلاً پانچ فیصد ) کے حصے کے بقد روزن کم شمار کیا جائے اور مال قبول کر لیا جائے اور حتمی معاملہ کرتے وقت اس کا وزن کم لکھا جائے۔ مثلاً اگر 100 من وزن میں دس فیصد کچر انکلا تو اس میں سے پانچ من تو وہ ہو گیا جس کی چھوٹ دی گئی ہے اور باقی پانچ من اضافی ہوا، اس لئے ہم یوں کرتے ہیں کہ ہم اس کا وزن کم شمار کر کے 95 من کے حساب سے ادا ئیگی کرتے ہیں اور یہ سب سپلائر کی رضامندی سے ہی کیا جاتاہے۔ (اگرچہ ایسا بھی ممکن ہے کہ بعد میں یہ کچرامزید نکلے یا یہ بھی ہو سکتا ہے کہ پانچ من کے بجائے تین من تک ہی نکلے ، اس کی وجہ یہ ہوتی ہے کہ ہم نے تو چند بوریوں کو ہی چیک کیا ہوتا ہے اور ان سے کچرے کی حتمی اور یقینی مقدار متعین کرنانا ممکن ہوتا ہے البتہ قریب قریب اندازہ ہو جاتا ہے۔
اب سوال یہ ہےکہ:
1. درج بالا صورت کا شرعاً کیا حکم ہے؟ نیز یہ بھی واضح رہے کہ یہاں خرید و فروخت کے معاملات دو طرح کے ہوتے ہیں، ایک تو یہ کہ ہم مال کا سودا کر چکے ہوتے ہیں اور پھر جب مال پہنچتا ہے تو اس کو چیک کیا جاتا ہے ، اور بعض اوقات Purchase Order دے کر مال منگوالیتے ہیں، اور مال چیک کرنے کے بعد پھر سودا کیا جاتا ہے ، دونوں صورتوں میں شرعی حکم کیا ہو گا ؟
2. اگر سپلائر کو کسی عیب کی وجہ سے سامان واپس کیا جائے تو واپسی کا خرچہ کس کے ذمہ ہو گا؟ واضح رہے کہ آج کل تجارتی اداروں اور کمپنیوں میں معروف یہی ہے کہ ایسا خرچہ سامان بھیجنے والا ( بیچنے والا) ہی اٹھاتا ہے۔

جواب

(1)۔۔۔ صورت مسئولہ میں مال فروخت کرنے والے کی رضامندی سے سوال میں ذکر کر دہ طریقہ اختیار کیا جاجاسکتا ہے۔اس مسئلہ کی تفصیل یہ ہے کہ اگر اب تک خرید و فروخت کا معاملہ نہیں ہوا ہے بلکہ مال چیک کرنے کےبعد با قاعده خرید و فروخت ہوتی ہے تو ایسی صورت میں فریقین کو قیمت کی کمی بیشی کروانے کا اختیار ہوتا ہے، لہذااگر بائع اپنی رضامندی سے سو من وزن والے مال کو 95 من وزن کے حساب سے فروخت کرنے پر راضی ہو جائے تو شرعاً ممنوع نہیں ہے۔

اور اگر خرید و فروخت کا معاملہ مال آنے سے پہلے ہی مکمل ہو جاتا ہے تو ایسی صورت میں معروف مقدارسے زائد کچرا نکلنا عیب ہے، لہذا اگر مال خریدتے وقت آپ کو علم نہ ہو اور بائع نے تمام عیوب سے براءۃ کی شرط بھی نہ لگائی ہو تو ایسی صورت میں خریدار کو بائع کی رضامندی کے بغیر قیمت کم کروانے کا اختیار نہیں ہوتا، بلکہ خریدار یا تو پوری ہی قیمت ادا کر کے مال لے لے، یا اپنی رقم واپس لے لے اور مال نہ لے ، اور اگر عیب والا مال لےلیا ہو تو اسے واپس کر دے، لیکن اس صورت میں اگر بائع عیب دار مبیع واپس نہ لے اور اپنی خوشی ورضامندی سےعیب کی وجہ سے اپنے مال کی قیمت کم کرنے پر راضی ہو جائے تو جائز ہے۔(1)

(2)۔۔۔ اگر خرید و فروخت کا معاملہ مال چیک کرنے کے بعد ہو تو عیب کی وجہ سے سامان واپس کرنے کا خرچہ سامان فروخت کرنے والے کے ذمہ ہوگا، لیکن اگر خرید و فروخت کا معاملہ مکمل ہو چکا ہو اور عیب کی وجہ سے سامان واپس کرنا پڑ جائے تو اس صورت میں واپسی کا خرچہ شرعاً خریدار کے ذمہ ہو گا، تجارتی اداروں اور کمپنیوں کے عرف کی وجہ سے بائع کو واپسی کے خرچہ کی ادائیگی پر مجبور نہیں کیا جا سکتا، البتہ اگر بائع اپنی خوشی و رضامندی سے واپسی کا خرچہ خود برداشت کر لے تو کر سکتا ہے۔(2) (ماخذ الشق الثانی تبویب: 47/ 1439)