سپر اسٹورز سے مصنوعات کی تشہیر کے لیے جگہ کرائے پر لینے کا حکم

سوال

ہماری ایک تجارتی کمپنی ہے اور ہمیں اپنی مصنوعات کی پروموشن اور تشہیر کے حوالے سے ایک مسئلے کے سلسلے میں شرعی رہنمائی درکار ہے؛

آج کل دکانوں کی جگہ اکثر بڑے بڑے سپر اسٹور وجود میں آچکے ہیں جہاں گاہکوں کو ایک ہی چھت کے نیچے اپنی ضرورت کی تمام چیزیں عام دکانوں کے مقابلے میں ستے ریٹ پر مل جاتی ہیں۔ ان سپر اسٹور ز کو کمپنیوں سے بڑی مقدار میں مال خریدنے کی وجہ سے عام دکانداروں کے مقابلے میں زیادہ ڈسکاؤنٹ کے ساتھ مال ملتا ہے۔

سیلز کے نقطۂ نظر سے آجکل سپر اسٹور دو قسم کے ہیں؛

1. ایک تو وہ ہیں جو بہت بڑے بڑے ہیں انہیں پرائمری کسٹمرز کہا جاتا ہے جیسے کہ ہائپر اسٹار، امتیاز ، الفتح، وغیرہ

2. جب کہ دوسرے وہ ہیں جن کا حجم ان سے کم ہے وہ ہر شہر میں بے شمار ہیں۔ اور انہیں سیکنڈری کسٹمرز کہا جاتا ہے۔
کمپنیوں کا مال عمومی طور پر ڈسٹری بیوٹرز کے ذریعے ہی دکانوں اور اسٹور ز تک پہنچتا ہے تاہم پہلی قسم کے کسٹمرز کو مال کچھ کمپنیاں بر اہ ِر است خود فراہم کرتی ہیں اور دوسری قسم کے کسٹمرز کو حسبِ ترتیب ڈسٹری بیوٹرز کے ذریعے ہی مال کی سپلائی کی جاتی ہے۔

عموماً وہی مال زیادہ بکتا ہے جو ڈ سپلے پر نمایاں نظر آئے۔ چنانچہ ایک ہی جیسی مصنوعات بنانے والی مختلف کمپنیوں میں سےہر ایک کی یہی کوشش ہوتی کہ ان کی تیار کردہ مصنوعات نظر آئیں۔ گاہکوں کی اس نفسیات اور کمپنیوں کی مقابلہ بازی سے فائدہ اٹھاتے ہوئے سپر اسٹور ز مالکان نے اپنے اسٹور ز میں سامان رکھنے کی جگہ کرائے پر دینا شروع کر کے اس طرح بھی منافع کمانا شروع کر دیا ہے۔ اور یہ کام مارکیٹ میں اتنا عام ہو گیا ہے کہ اب مصنوعات تیار کرنے والی کمپنیوں کی مجبوری اور ضرورت بن گئی ہے کہ وہ ان اسٹورز کو اشیاء سستی فراہم کرنے کے ساتھ ساتھ اپنی اشیاء مناسب جگہ پر رکھوانے کے لئے الگ سے جگہ بھی ضرور کرائے پر لیں ، اگر جگہ نہ خریدی جائے تو اسٹور مالکان یا تو سامان خریدنے سے انکار کردیتے ہیں یا سامان کو ڈسپلے میں نہیں رکھتے جس کی وجہ سے وہ پروڈکٹ زیادہ نہیں بکتی، اور انتہاءً اس کا نقصان کمپنی کو ہوتا ہے، اس لئے مجبوراً ان سے شیلف لینا پڑتا ہے اور اس کے بدلے ماہانہ متعین چار جزادا کئے جاتے ہیں۔

مارکیٹ کے اس چلن کی وجہ سے اب ہماری بھی مجبوری بن گئی ہے کہ ہم بھی اپنی مصنوعات کیلئے جگہ (شیلف) کرائے پرلیں کیونکہ نہ لینے کی صورت میں مناسب ڈسپلے نہیں ملے گا جبکہ دوسری طرف مقابلے میں موجود کمپنیاں اس طریقِ کار کو اختیارکر کے ہماری سیلز پر اثر انداز ہو سکتی ہیں۔

اب جگہ کرائے پر لینے کیلئے جو معاہدہ کیا جاتا ہے اس کی دو صورتیں ہیں۔

• یا تو یہ معاہدہ اور سامان کی فروختگی کا معاملہ ایک ساتھ ہی کئے جاتے ہیں جیسا کہ پرائمری کسٹمرز وغیرہ کے ساتھ جومعاہدے ہوتے ہیں ان میں چونکہ کمپنی انہیں بر اہ ِر است فروخت کر رہی ہوتی ہے اس لئے دونوں معاملے ایک ساتھ ہی کر لئے جاتےہیں۔

• یا مال فروخت کرنے کا معاملہ الگ ہوتا ہے اور جگہ خریدنے کا معاملہ الگ ہوتا ہے، جیسا کہ سیکنڈری کسٹمرز کو مال تو ڈسٹری بیوٹر ز دیتے ہیں، تاہم جگہ کرائے پر لینے کا کام کمپنی اپنے سیلز کے شعبہ کے ذریعہ کرتی ہے۔ان کے ساتھ جو معاہدہ نامہ (agreement) کیا جاتا ہے اس میں یہ بات طے ہوتی ہے کہ اس اسٹور میں فلاں متعین جگہ اتنے عرصہ کیلئے ہم نے کرائے پر لے لی ہے اور اب اسٹور انتظامیہ اس بات کی پابند ہو گی کہ اس جگہ پر صرف ہمارا مال ہی رکھے گی،اور اس بات کو یقینی بنانے کیلئے ہم کسی بھی وقت چیک بھی کر سکتے ہیں۔ معاہدے کی بنیادی شقیں یہ ہوتی ہیں :


• دوکاندار طے شدہ دورانیے مثلاً ایک ماہ تک دو ہزار کے عوض اپنی دوکان کے شیلف نمبر ۔۔۔ میں ہماری مصنوعات رکھےگا۔

• دوکاندار طے شدہ دورانیے میں کسی اور کمپنی کی پروڈکٹ مذکورہ شیلف میں نہیں رکھے گا۔

• دوکاندار طے شدہ پروڈکٹ کے کم از کم 40 پیک اس مذکورہ دورانیے میں اس شیلف میں رکھے گا۔( یہ پیک دوکاندار کوہمارے ڈسٹری بیوٹر سے خرید نا ہونگے)اگلے ماہ کے لئے یہ معاہدہ تبھی برقرار رہے گا جبکہ دوکاندار سابقہ پروڈکٹس بیچ چکا ہو گا اور آئندہ ماہ مزید 40 پیک خریدے۔

اس ساری صور تحال کے پیش ِنظر اب سوال یہ ہے کہ ؛

1. کیا سپر اسٹور ز والوں کا ہم سے ہی خرید کردہ سامان رکھنے اور بیچنے کیلئے ہمیں اپنے اسٹور کی جگہ کرائے پر دے کر اس کامعاوضہ لینا ٹھیک ہے ؟ اس کی شرعی حیثیت کیا ہو گی؟

2. بعض اسٹور مالکان کمپنی سے مال خریدنے سے پہلے یہ شرط لگاتے ہیں کہ ہم آپ کا مال اسی وقت خریدیں گے جب آپ ہمارے اسٹور کا کوئی شیلف کرائے پر لیں گے۔ اس لئے مجبورا پہلے شیلف کے کرائے کا معاملہ کرنا پڑتا ہے۔ اور اس کے بعدمال سپلائی کیا جاتا ہے ، اسکی شرعی حیثیت کیا ہے؟ کیا کسی شخص کیلئے کوئی چیز خریدنے کیلئے اس قسم کی شرط لگانا جائز ہے؟آج کل جتنے بڑے سپر اسٹور ز ہیں ان میں بھی وہ عموماً کسی کمپنی کی چیز اس وقت تک نہیں خریدتے، جب تک وہ اس کورکھنے کی جگہ (شیلف) کرایہ پر نہ لے لیں، اور عموماً یہ اسٹور زاپنی شرائط میں رد و بدل پر بھی آمادہ نہیں ہوتے، ایسی صورت میں کمپنی اور سپر اسٹورز کے لئے کیا حکم ہے؟

3. منسلک معاہدے میں کوئی شق شرعاً محلِ نظر ہو تو نشاندہی فرمادیں ؟ اس قسم کے معاہدے میں کن شرائط کو ملحوظ رکھاجائے براہ کرم تفصیل سےآگاہ فرمائیں۔

جواب

صورت مسئولہ میں جب کمپنی کا نمائندہ با قاعدہ ایجاب و قبول کے ذریعہ مال فروخت کر دے تو مال خریدنےکے بعد سپر اسٹور اور دکان والے اس مال کے مالک ہو جاتے ہیں، اس کے بعد سپر اسٹور اور دکان والے کیلئے اپنا ہی مملوکہ مال اپنی دکان میں نمایاں جگہ پر رکھنے کیلئے جگہ کے کرایہ کا مطالبہ کرنا جائز نہیں، اور عقدِ بیع میں اس طرح کی شرط لگانابھی درست نہیں۔البتہ اس کے متبادل کے طور پر درج ذیل صورتوں میں سے کوئی صورت اختیار کی جاسکتی ہے۔

1. کمپنی کی طرف سے اسٹور کو مال حتمی طور پر فروخت نہ کیا جائے، بلکہ سپر اسٹور میں فروخت کیلئے رکھاجائے اور وہ جتنا مال فروخت کریں انہیں اس کا کمیشن ملے، مال کے نفع و نقصان کا اُن سے تعلق نہ ہو، بلکہ وہ کمپنی کا نفع ونقصان ہو۔ اس صورت میں سامان چونکہ کمپنی ہی کی ملکیت ہے، اس لئے اگر سپر اسٹور والے یادکاندار یہ مال نمایاںشیلف میں رکھنے کیلئے شیلف کا کرایہ طلب کریں تو یہ صورت جائز ہے۔

2. دوسری صورت ”حیطِ شمن" کی ہے، یعنی کمپنی شیلف کا کرایہ دینے کے بجائے اپنے مال کی قیمت کم کر دے، مثلاً عقد کے وقت اسٹور والوں کے ساتھ یوں معاملہ کیا جائے کہ اگر آپ ہم سے خریدا ہوا مال نمایاں شیلف میں نہیں رکھیں گے تو اس کی قیمت (مثلا) مارکیٹ ویلیو کے مطابق ہوگی، اور اگر نمایاں شیلف میں رکھیں گے تو قیمت پر اتفاق ضروری ہے۔ تاہم اس صورت میں مال فروخت کرنے کے بعد اسٹور والوں کو نمایاں شیلف میں رکھنے پر مجبورنہیں کیا جاسکتا،البتہ عقد سے پہلے یا بعد میں اُن سے وعدہ لیا جاسکتا ہے جس کی پاسداری اُن پر دیانتاًلازم ہو گی۔

3. سپر اسٹور کا شیلف کرایہ پر لینے کے بجائے کمپنی از خود شیلف تیار کروائے یا سپر اسٹور سے اُن کا شیلف خرید لے، پھر وہ شیلف سپر اسٹور میں رکھنے کیلئے ان سے جگہ کرایہ پر لے۔ اس صورت میں شیلف کمپنی کی ملکیت ہوگااور کرایہ اسٹور کی جگہ کا ہوگا۔ اس کے بعد کمپنی، سپر اسٹور والوں کو اس بات کا پابند بنا سکتی ہے کہ ہمارے مملوکہ شیلف میں آپ وہی سامان رکھ سکتے ہیں جس کی ہماری طرف سے اجازت ہو۔


4. نیز یہ بھی ممکن ہے کہ کمپنی پہلے سپر اسٹور سے (مثلا) پورا ایک شیلف کرایہ پر لیکر اس کے کچھ حصہ میں اپنا سامان کمیشن پر فروخت کرنے کیلئے وہاں رکھ دے، اس کے بعد سپر اسٹور کو مال فروخت کرتی رہے، اور سپر اسٹوروالوں کو اجازت دیدے کہ ہمارا رکھا ہوا سامان ہمارے کرایہ پر لئے ہوئے شیلف میں ایک طرف رکھ کر بقیہ حصہ میں آپ ہم سے خریدا ہوا اپنا سامان رکھ سکتے ہیں۔ البتہ اس صورت میں کمیشن پر فروخت کیلئے رکھا ہوا مال جب ختم ہو جائے تو دوبارہ کچھ مال برائے فروخت دینا ہو گا۔