کمپنی کے پرچیزر کا کمپنی کیلئے خریداری کرنے پر سپلائرز سے کمیشن یا تحائف لینا

سوال

میں ایک کمپنی میں بطور انچارج شعبہ خرید (Purchase Dept) کام کرتا ہوں، اس شعبہ کی بنیادی ذمہ داری کمپنی کے لئے اشیاء کی خریداری کرنا ہوتا ہے، ادارہ (کمپنی) کو کسی بھی سامان کی ضرورت ہو اس شعبہ کا کام ہوتا ہے کہ وہ متعلقہ اداروں اور سپلائیر ز سے رابطہ کر کے وہ چیز خرید لیں، کمپنی کی طرف سے یہ شعبہ اس بات کا بھی پابند ہوتا ہے کہ متعلقہ چیز کے سپلائی کرنے والوں میں سے جس کےریٹ اور معیار سب سے اچھا ہو اسی سے اشیاء خریدی جائیں۔

دوسری طرف جو ادارے یا سپلائیر ز ہوتے ہیں ان میں سے ہر ایک کی کوشش ہوتی ہے کہ ہم ان سے خریداری کریں، چنانچہ مختلف سپلائیر زہم سے رابطہ کرتے ہیں اور ہمیں اس بات پر آمادہ کرنے کی کوشش کرتے ہیں کہ کمپنی کا آرڈر آپ ہمیں دیا کریں اور اس پر وہ ہمیں ذاتی طور کچھ کمیشن نفع یا گفٹ وغیرہ دیتے ہیں ۔

اب اگر ان کا سامان کمپنی کی شرط کے مطابق معیاری اور کم ریٹ والا ہو اور اس سپلائر کو آرڈر دینے میں کمپنی کو کوئی نقصان بھی نہ ہو توکیا اس سپلائز کو آرڈر دینا جائز ہو گا اور جو نفع اور گفٹ وغیر ہ وہ ہمیں دیں ہمارے لئے حلال ہو گا؟اگر یہ رشوت ہے اور حرام ہے (بقول ایک عالم صاحب) تو کیا یہ صورت ہو سکتی ہے کہ کسی سپلائیر کے ساتھ میں شرکت کا معاملہ کرلوں اورکمپنی کا آرڈر اپنی شراکت دار سپلائیر کو جاری کر دیا کروں، اس آرڈر پر جو نفع ہو گا میری شرکت کے متناسب مجھے حصہ مل جائے گا اور سامان بھی کمپنی کی مذکورہ شرط کے مطابق ہو گا اور کمپنی کو کوئی نقصان بھی نہیں ہو گا ؟واضح رہے کہ یہ کام ہم کمپنی کے ذمہ داران کے علم میں لائے بغیر کریں گے کیونکہ ادارے کی جانب سے ہمیں اس بات کی ہر گز اجازت نہیں دی جاتی کہ ہم اپنے ذاتی فائدے کی خاطر کمپنی کے آرڈر اپنے شراکت دار ادارے کو جاری کریں، بلکہ علم ہونے پر ایسے ملازم کو فارغ کر دیا جاتا ہے۔

جواب

(1)۔۔۔مسئولہ صورت میں اگر آپ کسی سپلائر سے کمپنی کی شرط کے مطابق مال خریدتے ہیں (یعنی اس کا مال معیاری بھی ہے اور سب سے کم ریٹ والا بھی ہے) تب بھی آپ کے لیے اس سپلائر سے معاہدہ کر کےکمیشن یا کوئی نفع لینا جائز نہیں ہے، کیونکہ آپ کمپنی کے ملازم ہیں اور کمپنی کی شرط کے مطابق (معیاری اورسب سے کم ریٹ والا) مال خرید نا آپ کی اخلاقی اور شرعی ذمہ داری ہے، اور کمپنی آپ کو اسی بات کی تنخواہ دیتی ہے، اس لیے آپ اس سپلائر سے مال خرید کر اپنی ذمہ داری انجام دے رہے ہیں۔ اور اپنے ذمے لازم کام انجام دینے پر کوئی کمیشن لینا رشوت ہے، جو ناجائز اور حرام ہے۔ لہذا اس کمیشن لینے سے اجتناب کرنالازم ہے۔

نیز مذکورہ صورت میں سپلائر کے گفٹ کا حکم یہ ہے کہ اگر ان تحفے تحائف سے مقصود سپلائر کی کمپنی کی تشہیر ہو جیسے اس کمپنی کے نام سے بنی ہوئی چھوٹی موٹی اشیاء مثلاً کیلنڈر ، قلم اور لیٹر پیڈ وغیرہ جو کہ عام طور پر کمپنیاں اپنی پروڈکٹ کی تشہیر کے لیے بلا امتیاز تمام خریدار کمپنیوں کو دیتی ہیں، تو اس قسم کی چیزیں لینا آپ کے لیے درست ہے، لیکن اگر قیمتی اشیاء دی جائیں اور اس سے مقصود یہ ہو کہ آئندہ آپ ہر حال میں اسی سپلائر سے مال خرید یں (خواہ معیار اور ریٹ سب سے اچھا نہ ہو)، اور آپ بھی اس گفٹ کی وجہ سےآئندہ ہر حال میں اسی سپلائر سے مال خریدنے پر اخلاقی دباؤ محسوس کرتے ہوں ( اور اس سپلائر کا مال معیاری نہ ہونے یا ریٹ زیادہ ہونے کی صورت میں دوسرے سپلائر سے مال خریدنے میں رکاوٹ محسوس کرتےہوں، اور عموماً ایسا ہی ہوتا ہے ) تو اس صورت میں یہ گفٹ رشوت ہے۔ سپلائر کے لیے یہ گفٹ دینا اور آپ کے لیے لینا جائز نہیں ہے۔ (ماخذہ تبویب: 802/74 بتصرف)
(2)۔۔۔ سوال میں مذکور وضاحت کے مطابق کمپنی کی طرف سے آپ کو اس بات کی اجازت نہیں ہے کہ آپ کمپنی کا مال اپنے شراکت دار ادارے سے خریدیں، بلکہ اس کام کی صراحۃ ممانعت ہے، اس لیےاگر آپ کسی سپلائر کے ساتھ شراکت کر لیں، اور پھر وہ شراکت دار سپلائر آپ کو کمپنی کی شرط کے مطابق مال بیچے تب بھی آپ کے لیے کمپنی کا مال اس سپلائر سے خرید نا جائز نہیں ہو گا۔